തുഗ്ലക്കിയന്‍ സിദ്ധാന്തങ്ങള്‍ക്കു പിന്തുണ കിട്ടുന്നതിന്‍റെ രഹസ്യം

പ്രത്യക്ഷത്തില്‍ത്തന്നെ യുക്തിരഹിതവും ബുദ്ധിശൂന്യവും ആയ ചില സിദ്ധാന്തങ്ങള്‍ ചിലര്‍ എഴുന്നള്ളിക്കും. അതില്‍ അത്ഭുതമില്ല.  അത്ഭുതം അവയ്ക്കു കിട്ടുന്ന ശക്തവും വ്യാപകവും ആയ പിന്തുണയിലാണ്. അത്ഭുതകരമായ ഈ പ്രതിഭാസത്തിന്‍റെ കാരണങ്ങള്‍ ചിന്തനീയമാണ്.

നഴ്സിംഗ് കാളേജില്‍ പഠിക്കാന്‍ നല്ല വെളുപ്പു നിറമുള്ള പെണ്‍കുട്ടികളെ മാത്രം തെരഞ്ഞെടുത്താല്‍ വമ്പിച്ച പുരോഗമനമാകും എന്നു പ്രതാപശാലിയായ ഏതെങ്കിലും ഒരു ഭരണാധികാരിക്കു തോന്നി എന്നിരിക്കട്ടെ. അയാള്‍ അയാളുടെ അധികാരവും സ്വാധീനശക്തിയും ഉപയോഗിച്ച് ആ സിദ്ധാന്തം നടപ്പിലാക്കാന്‍ ശ്രമിക്കും. അയാളുടെ പ്രവൃത്തിക്കു പിന്തുണ കിട്ടാന്‍ പാടില്ലാത്തതാണ്. എന്തുകൊണ്ടെന്നാല്‍ അത് ഒരു തുഗ്ലക്കിയന്‍ സിദ്ധാന്തമാണ്‌. പക്ഷെ നമ്മെ അമ്പരപ്പിച്ചുകൊണ്ട്‌ ആ സിദ്ധാന്തത്തിനു ശക്തവും വ്യാപകവും ആയ പിന്തുണ കിട്ടും. ഇതിന്‍റെ കാരണമാണു നാം അന്വേഷിച്ചു കണ്ടുപിടിക്കേണ്ടത്. ഓരോ തരം പിന്തുണയുടെയും സ്വഭാവം നമുക്കു പ്രത്യേകമായി പരിശോധിക്കാം.

  1. പ്രയോജനാപേക്ഷിതം

ഏതു മൂഢസിദ്ധാന്തവും ചിലര്‍ക്കു പ്രയോജനം  ഉണ്ടാക്കി കൊടുക്കും. ഉദാഹരണമായി മേല്‍പ്പറഞ്ഞ സിദ്ധാന്തം വെളുത്ത നിറമുള്ള പെണ്‍കുട്ടികള്‍ക്കു വളരെ പ്രയോജനകരം ആയിരിക്കും. കറുത്ത പെണ്‍കുട്ടികളെ ബഹുദൂരം പിന്തള്ളിക്കൊണ്ട് അവര്‍ക്കു നിഷ്പ്രയാസം ജോലി നേടാം. അതിനാല്‍ അവരും അവരുടെ അച്ഛനമ്മമാരും ബന്ധുമിത്രാദികളും എല്ലാം ഈ സിദ്ധാന്തത്തെ ശക്തമായി പിന്തുണയ്ക്കും. അവനവനു പ്രയോജനം ഉണ്ടെങ്കില്‍ ഏതു തുഗ്ലക്കിയന്‍ സിദ്ധാന്തവും ഐന്‍സ്റ്റീന്‍റെ സിദ്ധാന്തം പോലെ വിലപ്പെട്ടതായി മാറും. എനിക്കു ഗുണം കിട്ടുമെങ്കില്‍ ഞാന്‍ ഏതു ചെകുത്താനെയും പിന്തുണയ്ക്കാം എന്നതാണ് ഇക്കൂട്ടരുടെ മനോഭാവം. ശരി, തെറ്റ്, സത്യം, നീതി, ധര്‍മ്മം ഇതൊന്നും അവര്‍ പരിഗണിക്കുകയില്ല.

കേരളത്തിന്‍റെ തലസ്ഥാനം മൂന്നാറിലേക്കു മാറ്റണമെന്ന് ഏതെങ്കിലും അഭിനവ തുഗ്ലക്ക് തീരുമാനിച്ചാല്‍ മൂന്നാറിലെ ഭൂമികയ്യേറ്റമാഫിയ അതിനു ശക്തമായ പിന്തുണയുമായി മുന്നോട്ടു വരും. ഇതാണു പ്രയോജനാപേക്ഷിത പിന്തുണ.

2. സ്തുതിപാഠകജന്യം

എല്ലാ ഉന്നതന്മാര്‍ക്കും കുറേ സ്തുതിപാഠകന്മാര്‍ ഉണ്ടായിരിക്കും. അവരും ഗുണദോഷങ്ങള്‍ ഒന്നും ചിന്തിക്കാതെ തങ്ങളുടെ അന്നദാതാക്കളായ പൊന്നുതമ്പുരാന്മാരുടെ സിദ്ധാന്തങ്ങളെ വീറോടെയും വാശിയോടെയും പിന്തുണയ്ക്കും.

3. പൊങ്ങച്ചപ്രേരിതം

ചില പൊങ്ങച്ചക്കാരുണ്ട്. അവര്‍ക്ക് എപ്പോഴും ഉന്നതന്മാരുടെ ഇടയില്‍ ഒരു സ്ഥാനം ലഭിക്കണം എന്ന അദമ്യമായ ആഗ്രഹം ഉണ്ടായിരിക്കും. അതിനാല്‍ അവര്‍ ഉന്നതന്മാരോട് എപ്പോഴും ഐക്യദാര്‍ഢ്യം പ്രകടിപ്പിക്കും. ഈ  മഹാനെ പിന്തുണച്ചില്ലെങ്കില്‍ എന്‍റെ സ്റ്റാറ്റസ്‌ താഴ്ന്നു പോകുമോ? ഞാന്‍ സമൂഹത്തില്‍ വിലയില്ലാത്തവനായിപ്പോകുമോ? ഒറ്റപ്പെട്ടു പോകുമോ? ഇങ്ങനെയൊക്കെ എപ്പോഴും ഭയപ്പെട്ടു കഴിയുന്ന അവര്‍ മറിച്ച് ഒരഭിപ്രായം പറയാന്‍ ഒരിക്കലും തയ്യാറാവുകയില്ല.

4. കഥയറിയാതെയുള്ളത്

കഥയറിയാതെ ആട്ടം കാണുന്നവര്‍ ധാരാളമുണ്ട്. അവര്‍ക്കു സ്വയം ചിന്തിച്ച് ഒരു തീരുമാനത്തില്‍ എത്താന്‍ കഴിയുകയില്ല. അതിനാല്‍ അവരും ഉന്നതന്മാര്‍ പറയുന്നതിനെ വേദവാക്യമായി കരുതി നിരുപാധികമായ പിന്തുണ കൊടുക്കുന്നു.

“വമ്പിച്ച പുരോഗമനം”, “മഹത്തായ കണ്ടുപിടിത്തം”, “ബുദ്ധിപൂര്‍വ്വമായ പരിഷ്കാരം”, “നിസ്വാര്‍ത്ഥമായ സേവനം” എന്നൊക്കെ പറഞ്ഞ് ഇവരെല്ലാവരും കൂടി സിദ്ധാന്തക്കാരനെ വാനോളം പുകഴ്ത്തും. അപ്പോള്‍ അയാള്‍ വര്‍ദ്ധിതവീര്യനായി തന്‍റെ സിദ്ധാന്തവുമായി മുന്നോട്ടു പോകും.

ഇങ്ങനെ പല കോണുകളില്‍ നിന്നും ശക്തമായ പിന്തുണ ലഭിക്കുന്നതിനാല്‍ കാറ്റിന്‍റെ സഹായം ലഭിച്ച കാട്ടുതീ പോലെ സിദ്ധാന്തം വളര്‍ന്നു ശക്തി പ്രാപിക്കുന്നു. കാട്ടുതീ കാടിനെ ഭസ്മമാക്കുന്നതു പോലെ സിദ്ധാന്തം പ്രസ്ഥാനത്തെ നശിപ്പിച്ചു നാമാവശേഷം ആക്കുന്നു.

നേഴ്സിന്‍റെ ജോലിയും തൊലിയുടെ നിറവും തമ്മില്‍ യാതൊരു ബന്ധവും ഇല്ല. ഒരു നേഴ്സിനു വേണ്ടത് അനുകമ്പ, മനുഷ്യത്വം, നല്ല പെരുമാറ്റം, അറിവ്, സേവനമനസ്ഥിതി മുതലായ ഗുണങ്ങളാണ്. കറുത്ത പെണ്‍കുട്ടികള്‍ക്കും ഇതൊക്കെ ഉണ്ടാകാം. വെളുത്ത തൊലിയില്ല എന്നു പറഞ്ഞ് അവരുടെ അവകാശങ്ങള്‍ നിഷേധിക്കുന്നതു കടുത്ത അന്യായമാണ്. അതുകൊണ്ടു സിദ്ധാന്തത്തെ എതിര്‍ക്കണം എന്ന് അവര്‍ തീരുമാനിച്ചാലോ? മേല്‍പ്പറഞ്ഞ പിന്തുണക്കാര്‍ എല്ലാവരും ചേര്‍ന്ന് ഒറ്റക്കെട്ടായി കറുത്ത പെണ്‍കുട്ടികളെ പുച്ഛിച്ചും പരിഹസിച്ചും നിര്‍വീര്യരാക്കി തറപറ്റിച്ചു കളയും. അവര്‍ അര്‍ഹതയില്ലാത്തത് ആഗ്രഹിക്കുന്ന സ്വാര്‍ത്ഥമോഹികളായി മുദ്ര കുത്തപ്പെടും.

ഈ സാഹചര്യത്തില്‍ കറുത്ത കുട്ടികള്‍ക്ക് അവശേഷിക്കുന്ന ഒരേ ഒരു കച്ചിത്തുരുമ്പു രോഗികളുടെ പിന്തുണ തേടുക എന്നതാണ്. പക്ഷേ ബഹുഭൂരിപക്ഷം രോഗികളും തുഗ്ലക്കിയന്‍ സിദ്ധാന്തത്തിന് അനുകൂലമായി വോട്ടു ചെയ്യും. അതിനാല്‍ അവിടെയും അവര്‍ ദയനീയമായി പരാജയപ്പെടുകയും ഒറ്റപ്പെടുകയും ചെയ്യും.

ഒരു കാടു മുഴുവന്‍ നശിപ്പിക്കാന്‍ ഒരു തീപ്പൊരി മതി എന്ന് പറഞ്ഞതു പോലെയാണ് ഈ തുഗ്ലക്കിയന്‍ സിദ്ധാന്തങ്ങളുടെ കഥ. ഏതു പ്രസ്ഥാനത്തെയും നശിപ്പിച്ചു നാമാവശേഷം ആക്കാന്‍ ഏതെങ്കിലും ഒരു ഉന്നതന്‍റെ തലയില്‍ ഉദിക്കുന്ന ഒരു തുഗ്ലക്കിയന്‍ സിദ്ധാന്തം മതിയാകും.

ഒരു സാധാരണക്കാരന്‍റെ തലയില്‍ ഒരു തുഗ്ലക്കിയന്‍ സിദ്ധാന്തം ഉദിച്ചാല്‍ അതു താനേ കെട്ടടങ്ങിക്കൊള്ളും. പക്ഷേ പ്രതാപശാലികള്‍, സര്‍വ്വജ്ഞന്മാര്‍, ധനാഢ്യന്മാര്‍, സ്ഥലത്തെ പ്രധാന ദിവ്യന്മാര്‍, കെണികെട്ടിയ രാമന്മാര്‍, വീരപാണ്ഡ്യകട്ടബ്ബൊമ്മന്മാര്‍ മുതലായ വിശേഷണങ്ങള്‍ ഉള്ള ഉന്നതന്മാരുടെ തലയിലാണ് അത് ഉദിക്കുന്നതെങ്കില്‍ കഥ മറിച്ചാകും. പിന്തുണയുടെ കാറ്റ് അതിനെ ആളിക്കത്തിക്കുകയും പടര്‍ന്നുപിടിപ്പിക്കുകയും ചെയ്യും. അധികാരിയുടെ കോഴിമുട്ട കുടിയാന്‍റെ അമ്മി ഉടയ്ക്കും എന്നു പറഞ്ഞതുപോലെ അത് എല്ലാ എതിര്‍പ്പുകളെയും തകര്‍ത്തു മുന്നേറും. കണ്ടകശ്ശനി കൊണ്ടേ പോകൂ എന്നു പറഞ്ഞതുപോലെ ആകും പിന്നത്തെ അവസ്ഥ.

അക്ഷരശ്ലോകരംഗത്തും ഇത്തരം ഒരു തുഗ്ലക്കിയന്‍ സിദ്ധാന്തത്തിന്‍റെ തീപ്പൊരി വീഴുകയും മുന്‍പറഞ്ഞ പിന്തുണകള്‍ ആകുന്ന കാറ്റിന്‍റെ സഹായത്തോടെ അത് ഉജ്ജ്വലമായി പടര്‍ന്നുപിടിക്കുകയും ചെയ്തിട്ടുണ്ട്. ആ സിദ്ധാന്തത്തിന്‍റെ ചുരുക്കം ഇങ്ങനെയാണ്.

“അക്ഷരശ്ലോകത്തിന്‍റെ ലക്ഷ്യം ശ്രോതാക്കളെ ആഹ്ലാദിപ്പിക്കല്‍ ആണ്. സാഹിത്യമൂല്യമുള്ള ശ്ലോകങ്ങള്‍ തെരഞ്ഞെടുത്തു ചൊല്ലാനുള്ള കഴിവു, ശബ്ദമേന്മ, സംഗീതഗന്ധിയായ അവതരണശൈലി ഉദാത്താനുദാത്തങ്ങളെപ്പറ്റിയുള്ള അറിവ് ഇവയൊക്കെ ഉള്ളവര്‍ ചൊല്ലിയാലേ ശ്രോതാക്കള്‍ക്ക് ആസ്വാദ്യം ആവുകയുള്ളൂ. ഇത്തരം മേന്മകള്‍ ഇല്ലാത്തവരെ എലിമിനേറ്റു ചെയ്യണം. എങ്കില്‍ മാത്രമേ അക്ഷരശ്ലോകത്തിന്‍റെ വിലയും നിലയും വര്‍ദ്ധിക്കുകയുള്ളൂ. ഈ മേന്മകള്‍ ഉള്ളവര്‍ അച്ചുമൂളിയാലും അവരെ ജയിപ്പിക്കണം”.

അക്ഷരശ്ലോകം ചൊല്ലാന്‍ യഥാര്‍ത്ഥത്തില്‍ ഈ മേന്മകള്‍ യാതൊന്നും ആവശ്യമില്ല. സ്വന്തം ഓര്‍മ്മയില്‍ നിന്ന് അനുഷ്ടുപ്പ് അല്ലാത്ത ശ്ലോകങ്ങള്‍ തെരഞ്ഞെടുത്തു നിബന്ധനകള്‍ പാലിച്ചു തെറ്റു കൂടാതെ ചൊല്ലാനുള്ള കഴിവുണ്ടായാല്‍ മാത്രം മതി. സമത്വസുന്ദരമായ ഈ ജനകീയവിനോദത്തില്‍ മുന്‍പറഞ്ഞ മേന്മകളുടെ അടിസ്ഥാനത്തില്‍ ഉള്ള ഉച്ചനീചത്വങ്ങള്‍ക്കു യാതൊരു പ്രസക്തിയും ഇല്ല. അവ തികച്ചും നിയമവിരുദ്ധവും അന്യായവും ആണ്.

യാഥാര്‍ത്ഥ്യം ഇങ്ങനെയാണെങ്കിലും പിന്തുണയുടെ ശക്തി ഈ തെറ്റായ സിദ്ധാന്തത്തെ താങ്ങി നിറുത്തുകയും ശക്തിപ്പെടുത്തുകയും ചെയ്യുന്നു. ശ്രോതാക്കളുടെ ഇടയില്‍ ഒരു സര്‍വ്വേ നടത്തി നോക്കിയാല്‍ ബഹുഭൂരിപക്ഷം പേരും ഈ സിദ്ധാന്തത്തിന് അനുകൂലമായി വോട്ടു ചെയ്യും. എതിര്‍ക്കുന്നവര്‍ സ്വാര്‍ത്ഥന്മാരായി മുദ്രകുത്തപ്പെടും. സിദ്ധാന്തം ഉണ്ടാക്കിയ ഉന്നതന്മാരുടെ സ്തുതിപാഠകന്മാര്‍ അവരെ പുച്ഛിച്ചും പരിഹസിച്ചും തറപറ്റിച്ചു കളയും.

ഉന്നതന്മാരുടെ പിന്തുണക്കാര്‍, ശിങ്കിടികള്‍, കണ്ണിലുണ്ണികള്‍, ആശ്രിതന്മാര്‍, സ്തുതിപാഠകന്മാര്‍, ഇഷ്ടക്കാര്‍, ചാര്‍ച്ചക്കാര്‍ മുതലായവര്‍ ഉള്‍ക്കൊള്ളുന്ന ഒരു വന്‍പിച്ച പട തന്നെ സിദ്ധാന്തത്തെ പ്രതിരോധിക്കാന്‍ കച്ചകെട്ടി നില്‍ക്കുന്നു. സാധാരണക്കാര്‍ നിസ്സഹായരായി അന്തം വിട്ടു നില്‍ക്കുന്നു.

ശക്തവും വ്യാപകവും ആയ പിന്തുണ കിട്ടുന്നു എന്നതു കൊണ്ടു മാത്രം ഒരു സിദ്ധാന്തം ശരിയാണെന്നു വരുന്നില്ല. ഏതു സിദ്ധാന്തവും കൂലങ്കഷമായി ചിന്തിച്ചും അപഗ്രഥിച്ചും നോക്കിയിട്ടേ സ്വീകരിക്കാവൂ.

അക്ഷരശ്ലോകത്തിന്‍റെ ലക്ഷ്യം ശ്രോതാക്കളെ ആഹ്ലാദിപ്പിക്കല്‍ ആണെന്ന സിദ്ധാന്തത്തിനു സ്വരമാധുര്യവും പാട്ടും ഉള്ളവരുടെ ശക്തമായ പിന്തുണ ലഭിക്കും. ഇതും പ്രയോജനാപേക്ഷിതമായ പിന്തുണയാണ്. അത് കണ്ട് അക്ഷരശ്ലോകക്കാരുടെ കണ്ണു മഞ്ഞളിച്ചു പോകരുത്.

ഇത്തരം സിദ്ധാന്തങ്ങള്‍ക്കെതിരെ എല്ലാവരും ജാഗ്രത പാലിക്കണം. ഒരു സിദ്ധാന്തം തുഗ്ലക്കിയന്‍ ആണെന്നു ബോദ്ധ്യപ്പെട്ടാല്‍ പിന്നെ ഒട്ടും അലംഭാവം പാടില്ല. ന്യൂനപക്ഷം ആയിപ്പോയി എന്നു വച്ചു നിരാശരായി പിന്തിരിയാതെ പല്ലും നഖവും ഉപയോഗിച്ച് എതിര്‍ക്കുക തന്നെ വേണം.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s